Chitwan Patra

चितवन पत्र, भरतपुर । प्रभात दिदीबहिनी बचत तथा ऋण सहकारी संस्था लिमिटेडले शेयर सदस्यहरुको पाठेघरको मुखको भिआईए परीक्षण गरेको छ ।

सो अवसरमा बोल्दै क्यान्सर अस्पतालकी नर्स सुपरभाईजर अयोध्या पाठकले पाठेघरको क्यान्सरका बारेमा जानकारी गराउनु भएको थियो । उहाँले पाठेघरको मुखको क्यान्सर समयमा नै थाहा भएमा निको हुने रोग हुदाँहुदै पनि अधिंकाश महिलाहरुले समयमा नै स्वाथ्य परीक्षण नगरेर अकालमा ज्यान गुमाउने गरेको बताउनु भयो ।

पाठेघरको क्यान्सर रोकथामका लागि सामान्य जानकारी लिनेदेखि अनुसन्धान पनि गर्दै आएको भन्दै सुपरभाईजर पाठले कुनै लक्षण सहित र कुनै लक्षण विनापनि पाठेघरमा क्यान्सर हुन सक्ने भएकाले करिब तिन वर्षको फरकमा परिक्षण गराईराख्न सुझाव दिनुभयो । पाठेघरबाट रगत बग्ने, महिनावारी सुकेका महिलाहरुमा यौनीबाट रगत आउने, तल्लो पेट दुख्ने जस्ता लक्षण देखिएमा स्वाथ्य परिक्षण गर्न उहाँको सुझाव थियो ।

कार्यक्रममा संस्थाकी अध्यक्ष बिमला न्यौपाने ज्ञवालीले धेरै महिलाहरुमा पाठेघरको समस्या हुने र महिला दिदी बिहीनीहरुको समय समयमा स्वाथ्य परीक्षण गराउदा समयमा नै रोग पहिचान गर्न मद्धत पुगोस् भन्ने उदेश्यले सहकारीले यो कार्यक्रम राखेको जानकारी दिनुभयो ।

त्यसैगरी सचिव साधना पोख्रेलले रातदिन काममा खटिने महिलाहरु समस्या नपरेसम्म आफ्नो स्वाथ्य जाँच गर्न स्वाथ्य संस्थामा नजाने हुदाँ सहकारीले महिला दिदी बहिनीहरुलाई सुविधाको लागि यी र यस्ता कार्यक्रम राख्ने गरेको बताउनु भयो ।

कार्यक्रममा वी.पी. कोइराला मेमोरियल क्यान्सर हस्पीटलको प्राविधिक सहयोग रहेको थियो ।