Chitwan Patra

भरतपुर,साउन १३-

चितवनको भरतपुरमा सञ्चालन गरिएको शनिवारे मेलामा उपभोक्ताहरुको आकर्षण बढ्दै गएको छ । स्थानीय उत्पादनहरु एकै ठाँउमा किन्न पाइने भएपछि मेलामा उपभोक्ताको आकर्षण बढेको हो । चितवन उद्योग सङ्घले स्थानीय उत्पादनलाई प्रोत्साहन र प्रबद्र्धन गर्नेगरी चितवन प्रर्दशनी केन्द्रमा शनिबारे मेला सञ्चालन गरिरहेको छ । भरतपुर १२ बाट मेला अबलोकनका लागि आउनुभएका शिव पौडेलले मेलामा स्थानिय उत्पादन किन्न पाउँदा खुसी लागेको बताउनुभयो । उहाँले भन्नुभयो, ‘स्वदेशमै उत्पादन भएका अर्गानिक बस्तुहरु यहाँ किन्न पाइयो, यहाँ अझै धेरै दैनिक उपभोग्य बस्तुहरु बिक्रीका लागि राख्नुपर्छ ।’ उपभोक्ता मात्र होइन यहाँ स्टल राख्नुभएका कृषक र व्यवसायीहरु पनि उत्साहित हुनुभएको छ ।

कृषक शम्भु सुवेदी मेलामा उपभोक्ताको आकर्षणले कृषि उत्पादनमा झन् उत्साहित बनाएको बताउनुहुन्छ । उहाँले अर्गानिक तरकारी र फलफुलमा उपभोक्ताको आकर्षण रहेको बताउनुभयो । नियमित मेला आयोजना भए किसानले उत्पादन गरेका बस्तुहरु बारिमै कुहिने अवस्थाको अन्त्य हुने उहाँको भनाई छ ।