Chitwan Patra

पारसनगर, १२ पुस । भारद्वाज गोत्रीय पोखरेल प्रतिष्ठानको प्रथम चितवन जिल्ला भेला शनिबार पारसनगरमा सम्पन्न भएको छ । ‘एकीकृत साँस्कृतिक पहिचान, हाम्रो अभियान’ भन्ने मूल नाराका साथ सम्पन्न भेलाले भीमप्रसाद पोखरेलको अध्यक्षतामा १७ सदस्यीय कार्यसमिति समेत चयन गरेको छ ।
कार्यसमितिको उपाध्यक्षमा हेमराज पोखरेल र नेत्रबन्धु पोखरेल, सचिवमा इन्द्र पोखरेल, सह सचिवमा सुलभबन्धु पोखरेल र कोषाध्यक्षमा सुमित्रा पोखरेललाई चयन गरिएको प्रतिष्ठानले जनाएको छ । यसैगरी कार्यसमितिको सदस्यहरुमा खेमराज पोखरेल, उमा पोखरेल, ज्ञानेन्द्र पोखरेल, टीकादत्त पोखरेल, रामचन्द्र पोखरेल, चोलाकान्त पोखरेल, माधव पोखरेल, मेघनाथ पोखरेल, नमकला पोखरेल, धनपति पोखरेल र रामचन्द्र पोखरेल चयन भएका छन् ।

निर्वाचित समितिलाई बधाई दिँदै कार्यक्रमका प्रमुख अतिथि एवम् प्रतिष्ठानका केन्द्रीय अध्यक्ष ओमप्रसाद पोखरेलले सबै समुदायले आफ्नो ईतिहास खोजेर संगठित भईरहेका बेला प्रतिष्ठानको यो कार्यमा समाहित हुन सबैलाई अनुरोधसमेत गरे । अब यो संगठित अभियान परिष्कृत भई देशकै समृद्धितर्फ लाग्नुपर्नेमा उनको जोड थियो ।

कार्यक्रममा उपाध्यक्षहरु शंकरराज पोखरेल र माधवप्रसाद पोखरेल, महासचिव हरिप्रसाद पोखरेल, कोषाध्यक्ष रेखा पोखरेल, सह कोषाध्यक्ष धनप्रसाद पोखरेल र सदस्यहरु भीमप्रसाद पोखरेल, रामप्रसाद पोखरेलले महायज्ञबारे जानकारी गराउँदै हालसम्मका गतिविधिसम्बन्धमा जानकारी गराएको थिए ।

केन्द्रीय कार्यालय निर्माण सहयोगार्थ पोखरेलहरुले आगामी माघ ११ गतेदेखि १८ गतेसम्म चितवनको पारसनगरमा वृहद् महायज्ञ सञ्चालन गर्दैछन् ।
चितवनको देवघाटमा पोखरेलहरुको केन्द्रीय प्रतिष्ठान निर्माण गर्न स्व. चुणामणि पोखरेलले दिएको करिब डेढ कठ्ठा जमिनमा भारद्वाज ऋषिको मूर्ति सहित विश्राम गृह र मन्दिर निर्माण गरिने प्रतिष्ठानको तयारी छ ।

यसैगरी महायज्ञबाट संकलित रकमले धार्मिक पुस्तकालय निर्माण, एम्बुलेन्स सञ्चालन गर्ने पनि प्रतिष्ठानले जनाएको छ । महायज्ञ कार्यक्रम सम्पन्न गर्न ओमप्रसाद पोखरेलको संयोजकत्वमा मूल समिति निर्माण गरिएको छ । महायज्ञकै लागि विभिन्न ३२ वटा विषयगत उपसमितिसमेत निर्माण गरिएको छ ।