Chitwan Patra

चितवन- कोरोना भाइरस (कोभिड १९) को संक्रमण भएको आशंकामा आइसोलेसनमा राखिएका एक जना बिरामीको मृत्यु भएको छ। चितवनको भरतपुरस्थित कोरोना विशेष अस्थायी अस्पतालमा सोमबार बिहान भर्ना गरी आइसोलेसनमा राखिएका ३० वर्षीय एक युवकको मंगलबार बिहान मृत्यु भएको हो।

कोरोना अस्पतालका  चिकित्सक डा. भोजराज अधिकारीका अनुसार सोमबार बिहान चितवन मेडिकल कलेज शिक्षण अस्पतालबाट रिफर गरी उपचारका लागि भर्ना गरिएको थियो। वीरगञ्जका ती युवकको शव अस्पतालमै राखिएको छ। कोरोनाको लक्षणसँग मिल्दोजुल्दो समस्या पाइएपछि चितवन मेडिकल कलेजले कोरोना अस्पतालमा रिफर गरेको ती चिकित्सकले जानकारी दिए। युवक केही समयदेखि मिर्गौला, छाला र फोक्सोमा समस्या हुने लुपुस नामक रोगबाट पीडित थिए।

उनी हालसालै कतै विदेश नगएको उनको पारिवारिक स्रोतले बताएको छ। उनलाई वीरगञ्जबाट अस्पतालले रिफर गरी चितवन मेडिकल कलेज पठाएको थियो।

मृतक युवकलाई कोरोना भएको आशंकामा कोरोना अस्पतालमा आइसोलेसनमा राखिएको थियो। ती युवकको घाँटीको स्वाब निकालेर सोमबार नै नमुना परीक्षणका लागि काठमाडौँ पठाइएको छ। कोरोना संक्रमण भएको वा नभएको रिपोर्ट आउन बाँकी छ। कोरोना भाइरस परीक्षणको रिपोर्ट मंगलबार साँझसम्म वा बुधबारसम्म आइपुग्ने ती चिकित्सकले बताए।